قصة جميلة حتى الحرامية كان بيهم خير

(حرامي قبل عنده غيره) 

أبو جاسم رجال چبير توفي بداية الثمانينات مره سولف سالفه يگـول چنا بالعماره وچنت حرامي وگـبل الحرامي مايبوگـ  من ديرته لأن عيب .. يگـول مره نعتولي (وصفولي) تفگـة بديرة بعيدة واحنا إثنين رحنه عليه انبوگـها صعدت فرسي وصاحبي وراي وصلنا العرب ووچدنا المچان ( أكدنا مكان البيت) ورحنا بالليل وره مانامت الناس اجينه خليت صاحبي لازم الفرس مسافة وآنا وصلت للبيت طبعاً هو بيت شعر ... لگـيت مره تطحن برحا يگـول شاعلة بطل وتطحن اجيت من وره البيت وطبيت دورت التفگـة لگـيتها ردت آخذها واطلع .. والمرة التطحن گـامت يگـول آنا شفت مرة ثانيه بالبيت نايمة اتمددت بصفها منا لمن رجعت المره للرحا آنا گـمت ويه گـومتي المره التطحن التفتت شافتني وصرخت والمره البصفي گـعدت آنا أخذت التفگـة وشردت وصلت الصاحبي صعدنا علىٰ الفرس وشردنا وصلنا مسافة بعيدة گـلت الصاحبي أحنا مانروح لأهلنا گـال ليش گـتله يمكن راح تصير مشكلة من وراي لأن المره التطحن شافتني نايم بصف المره وعبالها غير شغلة گـال وهسه شنسوي گـتله نضل بمچانه للصبح وآنا أروح للعرب  وأنت تضل هنا إذا ماكو شي أجيك ونروح وإذا أكو شي نشوف شلون تصير يگـول رجعت للعرب ووصلت يم بيت شيخهم سلمت وگـعدت على أساس خطار لگـيت العرب تريد تتعارك أهل المرة وأهل الزلمة والسالفة مثل ماتوقعت عرفت الشيخ مالهم گـتله محفوظ تطيني البخت  (تعطيني الأمان) واحل الشغلة گـالي ألك البخت والديوان كله سكت گـتله محفوظ أكو واحد بالديوان يعرفني باوعو عليه كلهم گالوا  لا .. گـلت علمود مو يگولون هذا عاشگـها وشايفينه ..   گـتلهم عمي آنا حرامي وسالفتي كيت وكيت وسولفتلهم السالفة كلها .. گتلهم آنا تسترت بالمره النايمة حتىٰ لاتشوفني المره التطحن ..  يگـول العرب كلها حمدت رب العالمين ماصارت بيناتهم طلايب والشيخ گـال لأهل المره عليكم خمس دنانير ورجل المره عليك خمس دنانير والشيخ گـال آنا عليه خمس دنانير وقاط ألك وقاط الصاحبك والتفگـة ألك طبعاً سعر التفگـة بوكتها خمس دنانير  گـتله هديتكم مقبولة بس التفگـة ترجع الراعيها ..

مشينا آنا وچم واحد من العرب وصلنا الصاحبي رجعنا التفگـة وأخذنا هديتنا ورجعنا ومن هاي السالفه بطلت من الحرام وتبت وأسأل الله يغفرلي 

حتى حرامي قبل عنده غيرة